„Луѓето денес живеат подолго, се поздрави, не се принудени на тешки физички напори. Денешната цивилизација бара повеќе знаење и повеќе искуство, а помалку физичка подготвеност. Мислам дека треба да се пензионирате подоцна и да работите три дена во неделата“, рекол Слим во интервју за Блумберг, а пренесуваат Танјуг и „Јутарњи лист“.
Се вели дека мексиканскиот милијардер тоа не го кажал од чист алтруизам, туку водејќи се од деловната логика: радикалното скратување на работната недела ќе стимулира отворање нови работни места и ќе обезбеди поголема динамика на економијата.
Ако луѓето се слободни четири дена во неделата, не само што ќе им го зголеми квалитетот на живот, туку ќе доведе до голем раст на туризмот, забавната индустрија, културата, спортот, па дури и образованието.
Сопственикот на мексиканската телекомуникациска компанија беше најбогатиот човек на светот, а денес е на седмото место на листата на Форбс за најбогати луѓе во светот. Неговото богатство се проценува на 67 милијарди долари.
Слим наведува дека низ историјата, напредокот на технологијата довел до намалување на потребата од човечка работна сила.
„Наместо да отпуштате работници, скратете им го работното време. Подоцна ќе може да се пензионира и тоа дефинитивно ќе му се исплати на општеството бидејќи значително помалку пари ќе се трошат за исплата на пензиите“, вели Слим, кој на 76-годишна возраст не ни размислува за пензија.
Ова не е прв пат мексиканскиот милијардер да го повика светот да го намали работното време за да го зголеми бројот на вработени и целокупната благосостојба на општеството.
На конференција во Парагвај, Слим го повика светот да се сврти кон тридневната работна недела.
Тоа не е само негова идеја. Медиумите во Велика Британија ги објавија резултатите од студијата според која полицајците се продуктивни само три дена во неделата, а кога е топло и жешко само два и пол дена. Недостатокот на сон, превисоката температура во канцеларијата и неподносливите колеги кои се деконцентрираат се издвојуваат како главна причина за замор и слаба работа.
Истражувачите од Мелбурн објавија слични резултати. Работниците ќе бидат најдобро ако им ја намалите работната недела на три дена, јавува Би-Би-Си. Истражувањето било спроведено на 3.500 жени и 3.000 мажи постари од 40 години.
Тридневната работна недела е идеална ако сакате вашите луѓе да работат напорно и добро да работат, без да се разболат. Најдобри резултати имале оние кои работеле околу 25 часа неделно.
Кога човек работи пократки часови, има повеќе слободно време на располагање, па чувствува дека го има сопствениот живот под контрола, што го прави посреќен и следствено повешт и поуспешен во она што го работи, објаснуваат психолозите.
Извор: jutarnji.hr / Преземено од: stil.kurir.rs
