НОВО

Најнасилниот колумбиски дилер на дрога и водач на Заливскиот клан осуден на 45 години за трговија со дрога во САД


Водачот на познатиот колумбиски криминален синџир денеска беше осуден на 45 години затвор откако се изјасни за виновен за обвиненијата за трговија со дрога во САД. Окружниот судија на САД Дора Иризари му ја соопшти казната на Даир Антонио Усуга Дејвид (51), попознат како Отониел, на сослушување во федералниот суд во Бруклин, објави Ројтерс.

Обвинителите рекоа дека водачот на картелот „Клан дел Голфо“ (Клан на Заливот), кој се смета за најнасилен наркобос во Колумбија по Пабло Ескобар, водел „терористичка и паравоена организација“ речиси две децении и пропуштил можност да се демобилизира преку мировниот процес, кој се спроведува од страна на колумбиската влада.

„Тој беше принуден да се бори“

Судските документи од канцеларијата на американското правобранителство во Бруклин тврдат дека тој наредил убиство, киднапирање и тортура на ривалите, како и на поединци за кои верувал дека соработуваат со органите на прогонот.

Најнасилниот дилер на дрога во Колумбија и водач на Заливскиот клан

ФОТО: КАНЦЕЛАРИЈАТА НА АМЕРИКАНСКОТО ОБВИНИТЕЛСТВО ЗА ИСТОЧНИОТ ОКРУГ НА ЊУЈОРК ПРЕКУ АП / ТАНЈУГ/АП

Најнасилниот дилер на дрога во Колумбија и водач на Заливскиот клан

Отониел се изјасни за виновен во јануари, а неговите адвокати побараа максимална затворска казна од 25 години, велејќи дека пораснал во сиромаштија и бил принуден да се бори како дете-војник во 60-годишниот конфликт во Колумбија меѓу левичарските бунтовници и десничарските паравојски , криминалните групи и владата.

Заливскиот клан има повеќе од 1.000 вооружени луѓе, првенствено поранешни членови на десничарски паравоени групи. Отониел стана негов водач откако беше левичарски герилец. Колумбиските вооружени сили го уапсија во близина на границата со Панама во октомври 2021 година. Земјата го екстрадираше во САД следниот мај, под услов да не добие доживотна казна затвор.

(Танјуг)